HAUR HEZKUNTZA

Zangozako Ikastolan denbora daramagu konfiantzaren pedagogian lanean, pedagogia eraldatu dugu haurraren garapen osoaren ikuspegitik ikastolan sartzen den lehen unetik.

Haurtzaroan 0 eta 6 urte bitartean gertatzen diren eraldaketak oso handiak dira, bai kognitiboak, fisikoak edo emozionalak, bai nortasun propioaren eraikuntzatik eratorritakoak: lehen urratsak ematen dituztenetik, lehen hitzak esaten dituzte, komunikatzen hasten dira, sozializatzen... ez dago bizitzan hainbeste garatzen den beste etaparik.

Konfiantzaren pedagogia erreferentziatzat hartuta, dena eraldatu da: espazio irekiak eta argitsuak, moldagarriak eta aldagarriak; materialak: naturalak, moldagarriak eta desegituratuak, sormena garatu ahal izateko; eta, batez ere, haurra ulertzeko moduan. Hezitzaileak hiru printzipio ditu ardatz:

 

  • Bere izate osoa errespetatzea, haurraren izaera.

  • Garatzeko gaitasun naturalean konfiantza izatea.

  • Haurraren segurtasun fisikoa eta emozionala bermatzea.


Haien osotasuna errespetatuz, irakaslea bere bidelaguna izango da, zer egin behar duen esan beharrean, bere kabuz egiteko gai dela eta egiten lagunduko diola erakutsiko diona.

Ikastolan, haur-hezkuntzan, ez duzue espazio, jarduera eta talde itxirik aurkituko, espazio ireki eta moldagarriak, adin bakoitzerako jarduera ireki eta egokien proposamenak eta taldeen arteko elkarreragina aurkituko dituzue.